Os técnicos afirman que as súas conclusións non son tan pesimistas como as do INE e dalgúns organismos relacionados coa demografía, porque están traballando cos datos máis recentes dispoñibles. De todos os xeitos, existen grandes asimetrías con notables diferenzas entre a costa e os núcleos urbanos, por unha banda, e o resto da provincia, pola outra.

Esta é unha das conclusións da primeira fase do plan, a de recollida de datos. Onte comezou a segunda, que será de participación dado que funcionarán 21 mesas de traballo e serán consultados representantes de todos os sectores porque pretenden que sexa sobre todo moi participativo. Do realizado e dos prazos que faltan falaron en San Marcos o presidente da institución, José Ramón Gómez Besteiro; Alberto Meixide, director do Centro de Investigación de Estudos Financeiros de Caixa Galicia, e Melchor Fernández, director do Instituto Universitario de Estudos e Desenvolvemento de Galicia (Idega).

Segundo confirmou Besteiro, pola mañá houbo unha reunión de portavoces e pola tarde a mesa das mesas. Haberá un comité de dirección, que será o punto de encontro de todos os grupos e colectivos. Nesa primeira mesa, dedicada á demografía, foi presentado por Fernández un estudo pormenorizado de cada concello, que é o primeiro que se fai con ese detalle, o que permite fixar unhas previsións da evolución poboacional ata o 2020.

Con respecto ao mercado laboral, Melchor Fernández asegurou que se trata dunha provincia sen grandes oscilacións económicas. Dixo que o principal problema non é a taxa de desemprego, unha das máis baixas de España, senón outras máis específicas como os baixos salarios, a situación das mulleres ou a dependencia de determinados sectores.

Fonte: B. Lázare / La Voz de Galicia