Burgo recordou que o novo Goberno galego non terá que empezar de cero, porque o cuartel de San Fernando foi adquirido polo Concello e posteriormente cedido á Consellería de Cultura, que dirixía a nacionalista Anxela Bugallo, para a construción do Museo da Romanización.

De feito, Burgo tamén precisou que a Consellería de Cultura xa se gastou 90.000 euros en realizar as correspondentes escavacións arqueolóxicas no solar do cuartel, paso previo ao comezo das obras. Grazas a eses traballos, dixo a parlamentaria socialista, apareceron "restos romanos moi significativos que poden ser incorporados no futuro ao proxecto expositivo".

Subliñou que a continuación dos traballos destinados á creación do museo "é de extraordinaria importancia", tanto para a cidade de Lugo, "desde o punto de vista cultural e turístico", como para "a defensa e posta en valor do patrimonio en Galicia".

Por outra banda, recordou que o edificio do cuartel necesita dunha "actuación urxente" para evitar que continúe a súa paulatina "degradación".

Fonte: Ramudo / AGN (Lugo) /El Progreso