Ambas as subvencións, que poderían comportar unha dedución duns 2.200 euros para os usuarios que adquiran un vehículo novo e que poidan complementar tanto a rebaixa das firmas automobilísticas como as das dúas administracións por entregar o coche antigo e facerse cun recentemente saído de fábrica cuxo custo non exceda os 27.000 euros.

A subida de usuarios, "moi notable", segundo coinciden a maioría dos responsables dos trece concesionarios activos na capital provincial, vai do 100% calculado por Genaro Saavedra, xerente de Lugocar (Fiat, Lancia e Alfa Romeo) e Lugomotor (Ford), ao dez por cento manifestado polo seu homólogo da compañía Xistral Auto (Nissan e Honda), Ramón González.

De calquera modo, as axudas non se traduciron en vendas reais, segundo indicou o presidente da Federación Galega de Talleres (Fegat), o lucense Luis Abelleira. Asegura que existe unha paralización das matriculacións por mor da desinformación dos concesionarios sobre como se deben aplicar as subvencións.

Nesta tesitura atópanse decenas de vehículos na zona, como apuntaba o máximo responsable de Autolusa (Audi, Volkswagen e Skoda), Vicente Quintas, que cifrou en 22 "unidades", os coches á espera de matricular para darlles saída nas súas instalacións. "Consideramos que en tres ou catro días isto debería estar resolto e esperaremos", asegurou Quintas.
O ambiente provocado polas medidas de incentivación económica ao comprador, espertou inicialmente boas expectativas entre os membros do gremio automobilístico, porque "a corrente que se crea vai coincidir con xuño e xullo, meses tradicionalmente de subida en vendas, e estas medidas fan que se vaia camiño dos mellores meses dos tempos", segundo advertiu José Álvarez, xerente de Martínez Automoción. A valoración, en termos máis ou menos mesurados, secúndana os seus homólogos, que en varios casos adiantáronse á aplicación das medidas de rebaixa para as transaccións producidas estes días. "Nós estamos a respectar as medidas que se anuncian e aplicándoas", advertiu Javier García, xefe de vendas de Roysan Auto (Seat). "De calquera forma, esperamos para a entrega, o que beneficia tamén ao comprador", dixo.

A pesar das boas perspectivas, as dúbidas sobre como se farán efectivas as distintas liñas de financiamento son xeneralizadas no sector. O representante dos talleres asegurou que os profesionais están sumidos no "descoñecemento total" e sinalou que os plans se dispuxeron "con absoluta precipitación". "Hai menos operacións de venda que antes, porque o anuncio das axudas serviron para crear expectativas que non se poden cumprir. Aínda que o Plan Vive [que permitía o financiamento de 10.000 euros a interese cero durante cinco anos para a compra de utilitarios novos] non funcionaba como debese, si atraía a un perfil de comprador novo con recursos limitados. Agora ese plan xa se acabou, pero se descoñece como se van a aplicar as novas axudas", afirmou.

A xuízo de Abelleira, facer partícipes aos fabricantes das axudas foi un erro, xa que, segundo alerta, isto implicará que non todos os modelos de coche obteñan a mesma rebaixa. Serán os coches que os fabricantes teñan en stock' ‘os que obteñan as axudas máximas, de forma que o consumidor deberá adaptarse a esa oferta e, se quere obter rebaixas de 2.000 euros, cinguirse ao modelo que cada fabricante decida subvencionar. "Os concesionarios non sabemos se a axuda ten o IVE incluído ou non, se se aplica a coches de cinco anos ou non, cando imos cobrar as deducións... non sabemos nada", expuxo, coincidindo nesa postura con José Luís Sánchez, xerente do concesionario Gestoso (Renault), que destacou que "non hai negro sobre branco nun papel oficial e así aínda non hai garantías".

Nese sentido, a FEGAT confía en que o presidente da Xunta os reciba nos próximos días e lles aclare como se farán efectivas esas axudas. "É un tema moi importante. Debido ás escasas vendas ata agora, a tesourería dos concesionarios non é suficiente para adiantar as axudas. Se as subvencións se fan efectivas en quince días ou un mes, as entidades bancarias estarán dispostas a adiantar o diñeiro; se tardan seis meses, non", indicou, á vez que reclamou que se aclaren as formas de cobro e os prazos.
O anuncio realizado polo presidente autonómico, Alberto Núñez Feijóo, dunha iniciativa da Xunta para incentivar a compra de vehículos ampliou a pinza de adquisicións que se verán beneficiadas por deducións. Tras o exposto polo dirixente galego, os vehículos industriais lixeiros (ata 3,5 toneladas) tamén serán susceptibles de rebaixa, que chegará ata 1.500 euros. Dentro das medidas da Xunta e do Goberno queda aínda pendente se o límite de emisións contaminantes dos vehículos para as deducións quedarán establecido en 147 gramos de CO2 por quilómetro.

Fonte: E.R. + M.P. / El Progreso (Lugo)